信主耶穌進前 |
信主耶穌了後 |
1.認為事業做大，趁大錢,就是成功。 |
為濟濟喪鄉的人服務，安慰愈濟人的心靈才是偉大。 |
2.認為各種宗教攏叫人做善事，做功德，無啥差別，拜的對象無仝而已(niā-niā）。 |
上帝是獨一無二的真神，是自然而然的，永遠存在。咱是罪人，無法度自救，無靠上帝的獨生囝耶穌基督，無法度進天堂。 |
3.無違背良心，想欲做，就去做。 |
欲做的代誌敢有符合上帝的旨意？ |
啥人帶領我信主？𪜶是我的教會羅馬字老師：陳豐惠/陳明仁
我佇何時決志信主？主後2017年12月30日
我如何信主？
台灣歷任總統：李登輝總統上有做頭人的範(pān)，上有中心思想，無偏離正路，無論對內國會全面改選，總統直選，對外中國扑飛彈，抑是金融危機，呣驚任何阻礙，予台灣島嶼的人民無驚惶，有向望，伊是長老教會基督徒，一直攏是有上帝的引𤆬 (chhōa)（為主作見證：李登輝的信仰告白）。
真濟外國傳教士為台灣人無私奉獻，真濟喪鄉的所在，攏有𪜶的行踏(真濟原住民的庄社，傳教士親像𪜶的天使)。
我自度晬(tō͘-chè) 前就染著小兒痲痺,，5-6歲ê 時陣，嘉義基督教(小兒麻痺中心)病院手術了，才會當攑(gia̍h)拐仔行路，佇屏東、彰化教會攏有成立類似的中心。
我一個大學同學的老爸過往，去參加告別式，才知𪜶兜 (tau)是長老教會家庭，予我印象真深，故人略歷的部份 ，有伊的好朋友，講𪜶較早趣味的代誌，彼个氣氛是我較佮意--的。甲台灣傳統的告別式有真大的差別。
母語運動陳豐惠/陳明仁老師，𪜶教我教會羅馬字，予我有機會讀紅皮台語聖經，來知捌上帝的言語，對運動的堅持、犧牲、甲世俗無仝的價值觀，予我對𪜶真尊敬，是啥物予𪜶會當繼續堅持落去，𪜶講是信主的關係。
踏入重新教會前一個教堂是臺中市柳原教會，時間2016年正月16。彼工總統選舉了，就隨落去台中參加中山醫學大學廖瑞銘教授的告別式，伊在生前佇病房決志信主，予我想講人欲按怎無一定,若是出意外就無機會嘛無時間決志信主。
到重新教會，參加主日禮拜，看著 一.林文良牧師用喜樂的心甲笑容,，甲眾會友握手，精彩的講道；二.小組的聚會，大家歡頭喜面，若一家伙；三.2017年是宗教改革500年，聖經平民化，用上親的言語（母語）講出上帝話語，予咱閣較接近主；四.參加基要真理班，予我閣較知影咱人最大的悲慘是得罪上帝，干焦（kan-ta)耶穌會當提供救恩，干焦耶穌為咱人的罪來死，干焦耶穌對死裡閣活，才會當解決咱人罪的問題，這是任何其他宗教無的；我承認家己的罪，向上帝悔改，信靠主耶穌基督，才會當得救，予我的生命更新。這是我的見證，多謝。 |
